ji mein rah jae jaan mein rah jae

jī meñ rah jaa.e jaan meñ rah jaa.e

koī sūrat gumān meñ rah jaa.e

ishq vo hai jo dāġh-dār kare

dard vo jo nishān meñ rah jaa.e

aag aisī ho aa.ina chhalke

rang aisā ho dhyān meñ rah jaa.e

ḳhushbū aisī ho rāsta roke

aur badan imtihān meñ rah jaa.e

qurb aisā ho jism pighlā de

aañch is nīm-jān meñ rah jaa.e

ḳhaak aisī uḌā.ūñ qadmoñ se

hādisa āsmān meñ rah jaa.e

phuul aisā khile jo khiltā rahe

aur ḳhushbū chaTān meñ rah jaa.e

ḳhvāb aisā ho aañkh khulne par

zā.iqa sā zabān meñ rah jaa.e

qāmat aisī ho is qayāmat kī

sirf luknat bayān meñ rah jaa.e

zaḳhm aisā kabhī lage dil par

raushnī itr-dān meñ rah jaa.e

vahshat aisī jo dar-ba-dar ghūme

dasht vo jo makān meñ rah jaa.e

karvaT aisī ki silvaTeñ paḌ jaa.eñ

siskī aisī jo kaan meñ rah jaa.e

fāsla ho tavīl sā aur phir

ghar kahīñ darmiyān meñ rah jaa.e

ji mein rah jae jaan mein rah jae

koi surat guman mein rah jae

ishq wo hai jo dagh-dar kare

dard wo jo nishan mein rah jae

aag aisi ho aaina chhalke

rang aisa ho dhyan mein rah jae

KHushbu aisi ho rasta roke

aur badan imtihan mein rah jae

qurb aisa ho jism pighla de

aanch is nim-jaan mein rah jae

KHak aisi uDaun qadmon se

hadisa aasman mein rah jae

phul aisa khile jo khilta rahe

aur KHushbu chaTan mein rah jae

KHwab aisa ho aankh khulne par

zaiqa sa zaban mein rah jae

qamat aisi ho is qayamat ki

sirf luknat bayan mein rah jae

zaKHm aisa kabhi lage dil par

raushni itr-dan mein rah jae

wahshat aisi jo dar-ba-dar ghume

dasht wo jo makan mein rah jae

karwaT aisi ki silwaTen paD jaen

siski aisi jo kan mein rah jae

fasla ho tawil sa aur phir

ghar kahin darmiyan mein rah jae