ji raha hun abhi tadfin se roka jae

jī rahā huuñ abhī tadfīn se rokā jaa.e

zindagī ko mirī tauhīn se rokā jaa.e

aql ne dī hai duhā.ī ki bahar-taur mujhe

dil kī har baat pe āmīn se rokā jaa.e

solah-singhār udāsī ne kiye haiñ phir se

is ko ārā.ish o taz.īn se rokā jaa.e

ye kitābeñ to mohabbat kā sabaq detī haiñ

in ko nafrat ke mazāmīn se rokā jaa.e

rāste band kiye jaatā hai dīvānoñ par

dasht ko aise qavānīn se rokā jaa.e

girya ye girya-e-yāqūb se bhī aage kā

ab hameñ sabr kī talqīn se rokā jaa.e

Dhaal kī koī zarūrat nahīñ 'mas.ūd' agar

vaar ko sūra-e-yāsīn se rokā jaa.e

ji raha hun abhi tadfin se roka jae

zindagi ko meri tauhin se roka jae

aql ne di hai duhai ki bahar-taur mujhe

dil ki har baat pe aamin se roka jae

solah-singhaar udasi ne kiye hain phir se

is ko aaraish o tazin se roka jae

ye kitaben to mohabbat ka sabaq deti hain

in ko nafrat ke mazamin se roka jae

raste band kiye jata hai diwanon par

dasht ko aise qawanin se roka jae

girya ye girya-e-yaqub se bhi aage ka

ab hamein sabr ki talqin se roka jae

Dhaal ki koi zarurat nahin 'masud' agar

war ko sura-e-yasin se roka jae