ji raha hun main udasi bhari taswir ke sath

jī rahā huuñ maiñ udāsī bharī tasvīr ke saath

shor kartā huuñ siyah raat meñ zanjīr ke saath

surḳh phūloñ kī ghanī chhāñv meñ chupke chupke

mujh se miltā thā koī ik na.ī tanvīr ke saath

ik tirī yaad ki har saañs ke nazdīk rahī

ik tirā dard ki chaspāñ rahā taqdīr ke saath

kabhī zaḳhmoñ kā bhī ḳhanda-e-gul kā mausam

ham pe khultā rahā ik dard kī tafsīr ke saath

baat aapas kī hai aapas hī meñ rahne diije

varna ham surḳhiyāñ ban jā.eñge tash.hīr ke saath

aap kī mez pe phir ek nayā manzar hai

merī tasvīr bhī hai aap kī tasvīr ke saath

dil ke nazdīk sar-e-shām-e-alam ai 'nayyar'

zaḳhm ke chāñd chamak uThte haiñ tanvīr ke saath

ji raha hun main udasi bhari taswir ke sath

shor karta hun siyah raat mein zanjir ke sath

surKH phulon ki ghani chhanw mein chupke chupke

mujh se milta tha koi ek nai tanwir ke sath

ek teri yaad ki har sans ke nazdik rahi

ek tera dard ki chaspan raha taqdir ke sath

kabhi zaKHmon ka bhi KHanda-e-gul ka mausam

hum pe khulta raha ek dard ki tafsir ke sath

baat aapas ki hai aapas hi mein rahne dije

warna hum surKHiyan ban jaenge tashhir ke sath

aap ki mez pe phir ek naya manzar hai

meri taswir bhi hai aap ki taswir ke sath

dil ke nazdik sar-e-sham-e-alam ai 'nayyar'

zaKHm ke chand chamak uThte hain tanwir ke sath