ji tarasta hai muskurane ko

jī tarastā hai muskurāne ko

aag lag jaa.e is zamāne ko

ahl-e-duniyā ne khel samjhā hai

is zamāne meñ dil lagāne ko

kaash aisā bhī ek din hotā

aap sunte mire fasāne ko

ye ravish hai to ḳhud chaman vaale

ḳhaak kar deñge āshiyāne ko

jā-e-hairat hai kyoñ jahāñ vaale

tuul dete haiñ har fasāne ko

har qadam par haiñ tāna-o-dushnām

yaad rakkheñge ham zamāne ko

jī rahe haiñ bas ab to ai 'rahbar'

dostoñ ke fareb khāne ko

ji tarasta hai muskurane ko

aag lag jae is zamane ko

ahl-e-duniya ne khel samjha hai

is zamane mein dil lagane ko

kash aisa bhi ek din hota

aap sunte mere fasane ko

ye rawish hai to KHud chaman wale

KHak kar denge aashiyane ko

ja-e-hairat hai kyon jahan wale

tul dete hain har fasane ko

har qadam par hain tana-o-dushnam

yaad rakkhenge hum zamane ko

ji rahe hain bas ab to ai 'rahbar'

doston ke fareb khane ko