jine ki aarzu mein wo shiddat nahin rahi

jiine kī aarzū meñ vo shiddat nahīñ rahī

kaise kahūñ ki ab vo mohabbat nahīñ rahī

maiñ bhī kisī kā ho chukā tū bhī kisī kā hai

ik dūsre kī ab hameñ hājat nahīñ rahī

haiñ apne hī jahān meñ kuchh is tarah se gum

kuchh sā'atoñ kī bhī hameñ fursat nahīñ rahī

tere hī dam se raunaq-e-bazm-e-hayāt thī

jo tū nahīñ rahā mirī jannat nahīñ rahī

vo bhī to din the aañkh se haTtā nahīñ thā vo

ab ye bhī din haiñ milne kī chāhat nahīñ rahī

apnī madad kā aap hī qaa.il huā huuñ maiñ

'bāsit' mujhe kisī kī zarūrat nahīñ rahī

jine ki aarzu mein wo shiddat nahin rahi

kaise kahun ki ab wo mohabbat nahin rahi

main bhi kisi ka ho chuka tu bhi kisi ka hai

ek dusre ki ab hamein hajat nahin rahi

hain apne hi jahan mein kuchh is tarah se gum

kuchh sa'aton ki bhi hamein fursat nahin rahi

tere hi dam se raunaq-e-bazm-e-hayat thi

jo tu nahin raha meri jannat nahin rahi

wo bhi to din the aankh se haTta nahin tha wo

ab ye bhi din hain milne ki chahat nahin rahi

apni madad ka aap hi qail hua hun main

'basit' mujhe kisi ki zarurat nahin rahi