jine ki tamanna bhi marne ki ada Thahri

jiine kī tamanna bhī marne kī adā Thahrī

ham ahl-e-mohabbat ko kyā shart-e-vafā Thahrī

lamhoñ ke ta.āqub meñ har dar se guzartī hai

ye gardish-e-daurāñ bhī kashkol-e-gadā Thahrī

shīshe ke makānoñ meñ patthar ke sanam dekhe

sho.aloñ kī jabīnoñ par shabnam kī adā Thahrī

sūraj kī tamāzat se pighle haiñ bharam kyā kyā

ik mom kī parchhā.īñ phūloñ kī qabā Thahrī

ma.anī ke samundar meñ alfāz barahna haiñ

sāhil se hayā haT kar Thahrī to bajā Thahrī

fariyād ho yā naġhma ab koī nahīñ suntā

shā.ir kī sadā 'farhat' sahrā kī sadā Thahrī

jine ki tamanna bhi marne ki ada Thahri

hum ahl-e-mohabbat ko kya shart-e-wafa Thahri

lamhon ke taaqub mein har dar se guzarti hai

ye gardish-e-dauran bhi kashkol-e-gada Thahri

shishe ke makanon mein patthar ke sanam dekhe

shoalon ki jabinon par shabnam ki ada Thahri

suraj ki tamazat se pighle hain bharam kya kya

ek mom ki parchhain phulon ki qaba Thahri

mani ke samundar mein alfaz barahna hain

sahil se haya haT kar Thahri to baja Thahri

fariyaad ho ya naghma ab koi nahin sunta

shair ki sada 'farhat' sahra ki sada Thahri