jine mein ye ghaflat fitrat ne kyon tab-e-bashar mein daKHil ki

jiine meñ ye ġhaflat fitrat ne kyoñ tab'-e-bashar meñ dāḳhil kī

marne kī musībat jānoñ par kyoñ qudrat-e-haq ne nāzil kī

kyoñ tūl-e-amal meñ uljhāyā insān ne apne dāman ko

kyoñ zulf-e-havas ke phande meñ phañstī hai tabī'at ġhāfil kī

kyoñ hijr ke sadme hote haiñ kyoñ murdoñ pe zinde rote haiñ

kyoñ jang meñ jāneñ jaatī haiñ kyoñ baḌhtī hai himmat qātil kī

mantiq kā to dā'vā ek taraf tāqat kī ye shoḳhī ek taraf

kyā farq hai ḳhair-o-shar meñ yahāñ kyā jāñch hai haqq-o-bātil kī

jine mein ye ghaflat fitrat ne kyon tab'-e-bashar mein daKHil ki

marne ki musibat jaanon par kyon qudrat-e-haq ne nazil ki

kyon tul-e-amal mein uljhaya insan ne apne daman ko

kyon zulf-e-hawas ke phande mein phansti hai tabi'at ghafil ki

kyon hijr ke sadme hote hain kyon murdon pe zinde rote hain

kyon jang mein jaanen jati hain kyon baDhti hai himmat qatil ki

mantiq ka to da'wa ek taraf taqat ki ye shoKHi ek taraf

kya farq hai KHair-o-shar mein yahan kya jaanch hai haqq-o-baatil ki