jine wala ye samajhta nahin saudai hai

jiine vaalā ye samajhtā nahīñ saudā.ī hai

zindagī maut ko bhī saath lagā laa.ī hai

ye bhī mushtāq-adā vo bhī tamannā.ī hai

khiñch ke duniyā tire kūche meñ chalī aa.ī hai

khul ga.e naza.a meñ asrār-e-tilism-e-hastī

ziist kahte haiñ jise maut kī añgḌā.ī hai

kah ga.e ahl-e-chaman ye tire dīvānoñ se

hosh meñ aao zamāne meñ bahār aa.ī hai

maiñ kisī roz dikhā.ūñ dil-e-sad-chāk-adā

tujh ko mālūm to ho kyā tirī añgḌā.ī hai

DhūñDhtī kyuuñ na rahe us ko abad tak duniyā

jis ne chhupne kī azal hī meñ qasam khaa.ī hai

phuuT kar paañv ke chhāle mire laa.e ye rañg

baaġh to baaġh hai sahrā meñ bahār aa.ī hai

jalva-e-roz-e-azal ne mujhe bechain kiyā

pahlī duniyā meñ ye pahlī tirī añgḌā.ī hai

jis kī sehat ke liye aap duā.eñ māñgeñ

aise bīmār ko bhī maut kahīñ aa.ī hai

teġh-e-qātil ko pas-e-qatl nadāmat hogī

dam se 'bismil' hī ke ye ma.arka-ārā.ī hai

jine wala ye samajhta nahin saudai hai

zindagi maut ko bhi sath laga lai hai

ye bhi mushtaq-ada wo bhi tamannai hai

khinch ke duniya tere kuche mein chali aai hai

khul gae naza mein asrar-e-tilism-e-hasti

zist kahte hain jise maut ki angDai hai

kah gae ahl-e-chaman ye tere diwanon se

hosh mein aao zamane mein bahaar aai hai

main kisi roz dikhaun dil-e-sad-chaak-ada

tujh ko malum to ho kya teri angDai hai

DhunDhti kyun na rahe us ko abad tak duniya

jis ne chhupne ki azal hi mein qasam khai hai

phuT kar panw ke chhaale mere lae ye rang

bagh to bagh hai sahra mein bahaar aai hai

jalwa-e-roz-e-azal ne mujhe bechain kiya

pahli duniya mein ye pahli teri angDai hai

jis ki sehat ke liye aap duaen mangen

aise bimar ko bhi maut kahin aai hai

tegh-e-qatil ko pas-e-qatl nadamat hogi

dam se 'bismil' hi ke ye marka-arai hai