jit bhi jaenge aamada-e-paikar to hon

jiit bhī jā.eñge āmāda-e-paikār to hoñ

ham ulajhne ke liye vaqt se tayyār to hoñ

ḳhud-shanāsī to chalo Thahrī bahut duur kī baat

apne kirdār se ham log ḳhabar-dār to hoñ

maqsad-e-zīst zarā tū hī sadā de un ko

tujh se ho ke jo alag hote haiñ bedār to hoñ

dhuup ab tak to muñDeroñ pe chaḌhī baiThī hai

us ke āñgan meñ utar aane ke āsār to hoñ

aisā mushkil to nahīñ toḌ ke taare laanā

āsmāñ par shab-e-furqat meñ numūdār to hoñ

pas-e-manzar bhī bahut kuchh hai magar ham nazreñ

in nazāroñ se haTā lene ko tayyār to hoñ

maut kahte haiñ har ik dukh kī davā hai 'rāhat'

mar ke bhī dekheñge ham jiine se bezār to hoñ

jit bhi jaenge aamada-e-paikar to hon

hum ulajhne ke liye waqt se tayyar to hon

KHud-shanasi to chalo Thahri bahut dur ki baat

apne kirdar se hum log KHabar-dar to hon

maqsad-e-zist zara tu hi sada de un ko

tujh se ho ke jo alag hote hain bedar to hon

dhup ab tak to munDeron pe chaDhi baiThi hai

us ke aangan mein utar aane ke aasar to hon

aisa mushkil to nahin toD ke tare lana

aasman par shab-e-furqat mein numudar to hon

pas-e-manzar bhi bahut kuchh hai magar hum nazren

in nazaron se haTa lene ko tayyar to hon

maut kahte hain har ek dukh ki dawa hai 'rahat'

mar ke bhi dekhenge hum jine se bezar to hon