jit ki aur na haar ki zid hai

jiit kī aur na haar kī zid hai

dil ko shāyad qarār kī zid hai

koī bhī to nahīñ ta.āqub meñ

jaane kis se farār kī zid hai

ham se kuchh kah rahe haiñ sannāTe

par hameñ intizār kī zid hai

ishq chāhe ki lab ko jaam likhe

husn ko inkisār kī zid hai

bārhā ham ne sañgsār kiyā

par use e'tibār kī zid hai

ek anjām-e-tai-shuda ke liye

phir ḳhizāñ ko bahār kī zid hai

ik baar us se kyā milīñ nazreñ

dil ko ab baar baar kī zid hai

jit ki aur na haar ki zid hai

dil ko shayad qarar ki zid hai

koi bhi to nahin taaqub mein

jaane kis se farar ki zid hai

hum se kuchh kah rahe hain sannaTe

par hamein intizar ki zid hai

ishq chahe ki lab ko jam likhe

husn ko inkisar ki zid hai

barha hum ne sangsar kiya

par use e'tibar ki zid hai

ek anjam-e-tai-shuda ke liye

phir KHizan ko bahaar ki zid hai

ek bar us se kya milin nazren

dil ko ab bar bar ki zid hai