jite ji aaram na aaya

jiite jī ārām na aayā

marnā bhī kuchh kaam na aayā

mai apnī mai-ḳhāna apnā

ham tak daur-e-jām na aayā

dard ne kyā kyā pahlū badle

lab pe kisī kā naam na aayā

barq se thā kyā duur nasheman

us kā taḌapnā kaam na aayā

kah ga.ī nazreñ ġham kā fasāna

zabt pe kuchh ilzām na aayā

mai na milī gar pī liye aañsū

maiñ kabhī tishna-kām na aayā

pursish-e-ġham ko vo ḳhud aa.e

phir bhī mujhe ārām na aayā

kis se 'sa.īd' ab shikva kiije

koī bhī vaqt-e-shām na aayā

jite ji aaram na aaya

marna bhi kuchh kaam na aaya

mai apni mai-KHana apna

hum tak daur-e-jam na aaya

dard ne kya kya pahlu badle

lab pe kisi ka nam na aaya

barq se tha kya dur nasheman

us ka taDapna kaam na aaya

kah gai nazren gham ka fasana

zabt pe kuchh ilzam na aaya

mai na mili gar pi liye aansu

main kabhi tishna-kaam na aaya

pursish-e-gham ko wo KHud aae

phir bhi mujhe aaram na aaya

kis se 'said' ab shikwa kije

koi bhi waqt-e-sham na aaya