jite rahna bhi saza ho jaise

jiite rahnā bhī sazā ho jaise

jism suulī pe Tañgā ho jaise

sang itnā ye mo'attar kyoñ hai

tere hāthoñ ne chhuā ho jaise

āshiyāne meñ darāreñ itnī

ye bhī muflis kī qabā ho jaise

aisā lagtā hai dalīleñ sun kar

us kī pahlī hī ḳhatā ho jaise

qatl kartīñ ye nigāheñ terī

zahr in meñ bhī milā ho jaise

Duub jaatā maiñ yaqīnan lekin

paar us ne hī kiyā ho jaise

mere qātil kī 'ajab hālat thī

mujh se pahle vo marā ho jaise

jite rahna bhi saza ho jaise

jism suli pe Tanga ho jaise

sang itna ye mo'attar kyon hai

tere hathon ne chhua ho jaise

aashiyane mein dararen itni

ye bhi muflis ki qaba ho jaise

aisa lagta hai dalilen sun kar

us ki pahli hi KHata ho jaise

qatl kartin ye nigahen teri

zahr in mein bhi mila ho jaise

Dub jata main yaqinan lekin

par us ne hi kiya ho jaise

mere qatil ki 'ajab haalat thi

mujh se pahle wo mara ho jaise