jiwan pustak phaT jati hai kaghaz pila ho jata hai

jīvan pustak phaT jaatī hai kāġhaz piilā ho jaatā hai

aañsū koī laakh chhupā.e dāman giilā ho jaatā hai

bachchoñ ke sachche zehnoñ meñ jhūTī bāteñ mat Daalo

kāñToñ kī sohbat meñ rah kar phuul nukīlā ho jaatā hai

din-bhar to ham donoñ mil kar paanī shakar milāte haiñ

raat aate hī saarā sharbat kyoñ zahrīlā ho jaatā hai

insāno tum patthar-dil ho mol namak kā kyā jānoge

ye vo ġham hai jis ko khā kar bartan siilā ho jaatā hai

ā.īne ko ghar meñ rakh de saath meñ le ke mat ghūmā kar

sach kī dhuup meñ rahte rahte chehra niilā ho jaatā hai

chāhe aadam kī duniyā ho yā chhoTā sā ghar ho merā

dhīre-dhīre ek aadmī ek qabīla ho jaatā hai

giyān diye duniyā ko kyā-kyā lekin ḳhud anjān rahe

apne tan par apnā kurtā aksar Dhīlā ho jaatā hai

jiwan pustak phaT jati hai kaghaz pila ho jata hai

aansu koi lakh chhupae daman gila ho jata hai

bachchon ke sachche zehnon mein jhuTi baaten mat Dalo

kanTon ki sohbat mein rah kar phul nukila ho jata hai

din-bhar to hum donon mil kar pani shakar milate hain

raat aate hi sara sharbat kyon zahrila ho jata hai

insano tum patthar-dil ho mol namak ka kya jaanoge

ye wo gham hai jis ko kha kar bartan sila ho jata hai

aaine ko ghar mein rakh de sath mein le ke mat ghuma kar

sach ki dhup mein rahte rahte chehra nila ho jata hai

chahe aadam ki duniya ho ya chhoTa sa ghar ho mera

dhire-dhire ek aadmi ek qabila ho jata hai

giyan diye duniya ko kya-kya lekin KHud anjaan rahe

apne tan par apna kurta aksar Dhila ho jata hai