jin dinon kuchh aur irada tha bahana aur tha

jin dinoñ kuchh aur irāda thā bahānā aur thā

vo zamānā aur thā vo kār-ḳhāna aur thā

sājidān-e-kū-e-jānāñ kā zamāna aur thā

juñbisheñ vo aur thiiñ vo āstānā aur thā

dāġh-e-dil kyūñkar luTā detā maiñ hātim kī tarah

vo ḳhazāna aur thā merā ḳhazānā aur thā

kyoñ na kartā vo shikār-afgan dil-e-ushshāq said

har nishāna aur thā dil kā nishāna aur thā

mere arz-e-hāl meñ paḌhne lage tum nal-daman

vo fasāna aur thā merā fasāna aur thā

zaḳhmī-e-tīr-e-nigah teġh-e-zabāñ se mar ga.e

tiir khānā aur thā talvār khānā aur thā

shāh-e-ḳhaibar-gīr se marhab ko nisbat kaun thī

dar hilānā aur thā mugdar hilānā aur thā

āshiq-e-sādiq ko ma.ashūq-e-haqīqī chāhiye

qais-e-abla aur thā bahlol-e-dānā aur thā

dīn-e-ahmad se na the ai 'rashk' adyān-e-salaf

vo zamāna aur thā aglā zamāna aur thā

jin dinon kuchh aur irada tha bahana aur tha

wo zamana aur tha wo kar-KHana aur tha

sajidan-e-ku-e-jaanan ka zamana aur tha

junbishen wo aur thin wo aastana aur tha

dagh-e-dil kyunkar luTa deta main hatim ki tarah

wo KHazana aur tha mera KHazana aur tha

kyon na karta wo shikar-afgan dil-e-ushshaq said

har nishana aur tha dil ka nishana aur tha

mere arz-e-haal mein paDhne lage tum nal-daman

wo fasana aur tha mera fasana aur tha

zaKHmi-e-tir-e-nigah tegh-e-zaban se mar gae

tir khana aur tha talwar khana aur tha

shah-e-KHaibar-gir se marhab ko nisbat kaun thi

dar hilana aur tha mugdar hilana aur tha

aashiq-e-sadiq ko mashuq-e-haqiqi chahiye

qais-e-abla aur tha bahlol-e-dana aur tha

din-e-ahmad se na the ai 'rashk' adyan-e-salaf

wo zamana aur tha agla zamana aur tha