جن کے اچھے ہیں صنم ان کے کرم اچھے ہیں

جن کے اچھے ہیں صنم ان کے کرم اچھے ہیں

ان کے اچھے ہیں کرم جن کے صنم اچھے ہیں

تیرے کوچے کے مزے کب کو سمجھتا واعظ

اس کی تسکیں کے لئے ذکر ارم اچھے ہیں

جستجو کیجئے کتنی ہی نہیں ملتے وہ

ہاں انہیں ملتے ہیں بس جن کے کرم اچھے ہیں

کام آئیں بھی کسی کے تو نہ احسان رکھیں

اہل دنیا سے تو پتھر کے صنم اچھے ہیں

دل میں کمتر جنہیں ہونے کا ہے احساس وہی

سب سے کہتے ہیں وہ دنیا میں کہ ہم اچھے ہیں

یوں تو گنتی میں ہزاروں ہیں بھری خوبی مگر

کام دنیا کے اگر آئیں تو ہم اچھے ہیں

خوگر رسم ستم میں ہوا دیوانؔ اب تو

الغرض اپنے لئے اہل ستم اچھے ہیں