jin ke hathon mein sar hamare hain

jin ke hāthoñ meñ sar hamāre haiñ

vo hameñ jaan se bhī pyāre haiñ

mat falak par hameñ talāsh karo

ham to TuuTe hue sitāre haiñ

'qais'-o-'farhād'-o-hīr kī sūrat

'ishq ne kitne ruup dhāre haiñ

ġhaur kiije zarā to ham aur aap

ek dariyā ke do kināre haiñ

laakh kuchh bhī kahe hameñ duniyā

ham haiñ un ke to vo hamāre haiñ

bhuuk iflās ranj māyūsī

zindagī tere isti'āre haiñ

terī chāhat meñ 'ishq kī baazī

jiit jaane ke baa'd haare haiñ

tujh ko khonā tujhe ḳhafā karnā

ye ḳhasāre baḌe ḳhasāre haiñ

kaash koī kabhī kahe ham se

jaan ham aaj bhī tumhāre haiñ

jin meñ ḳhushiyāñ nasīb hotī haiñ

ham ne vo din kahāñ guzāre haiñ

ham ne duniyā meñ aa ke dekh liyā

aap duniyā meñ sab se pyāre haiñ

vo mirī jaan ke hue dushman

jin ke sadqe kabhī utāre haiñ

maiñ ne kāġhaz pe jo likhe the 'sabīn'

kuchh mazāmīn in meñ nyāre haiñ

jin ke hathon mein sar hamare hain

wo hamein jaan se bhi pyare hain

mat falak par hamein talash karo

hum to TuTe hue sitare hain

'qais'-o-'farhad'-o-hir ki surat

'ishq ne kitne rup dhaare hain

ghaur kije zara to hum aur aap

ek dariya ke do kinare hain

lakh kuchh bhi kahe hamein duniya

hum hain un ke to wo hamare hain

bhuk iflas ranj mayusi

zindagi tere isti'are hain

teri chahat mein 'ishq ki bazi

jit jaane ke ba'd haare hain

tujh ko khona tujhe KHafa karna

ye KHasare baDe KHasare hain

kash koi kabhi kahe hum se

jaan hum aaj bhi tumhaare hain

jin mein KHushiyan nasib hoti hain

hum ne wo din kahan guzare hain

hum ne duniya mein aa ke dekh liya

aap duniya mein sab se pyare hain

wo meri jaan ke hue dushman

jin ke sadqe kabhi utare hain

main ne kaghaz pe jo likhe the 'sabin'

kuchh mazamin in mein nyare hain