jin ke liye zamane ka hum zahr pi chale

jin ke liye zamāne kā ham zahr pī chale

ho kar vo bad-gumān ba-sad-be-ruḳhī chale

kuchh der Thahriye ki zarā dil kī baat ho

aa.e abhī abhī haiñ janāb aur abhī chale

ghar se nikal ke ham to sar-e-dasht aa ga.e

dekheñ kahāñ talak ye ġham-e-āshiqī chale

jaise kabhī bhī ham se koī vāsta na ho

vo chal rahe haiñ jaise koī ajnabī chale

ham rah-ravān-e-shauq ko manzil se kyā ġharaz

ham ko jidhar tumhārī Dagar le chalī chale

apne lahū se ḳhuub hue surḳh-rū 'majīd'

ham par hazār sang-e-sitam aaj bhī chale

jin ke liye zamane ka hum zahr pi chale

ho kar wo bad-guman ba-sad-be-ruKHi chale

kuchh der Thahriye ki zara dil ki baat ho

aae abhi abhi hain janab aur abhi chale

ghar se nikal ke hum to sar-e-dasht aa gae

dekhen kahan talak ye gham-e-ashiqi chale

jaise kabhi bhi hum se koi wasta na ho

wo chal rahe hain jaise koi ajnabi chale

hum rah-rawan-e-shauq ko manzil se kya gharaz

hum ko jidhar tumhaari Dagar le chali chale

apne lahu se KHub hue surKH-ru 'majid'

hum par hazar sang-e-sitam aaj bhi chale