jin ki tabir na ho KHwab wo aane se rahe

jin kī ta.abīr na ho ḳhvāb vo aane se rahe

ye azaab ab to ham āñkhoñ meñ basāne se rahe

khol hī leñge fasīloñ meñ na.e dar ham log

laakh mahbūs sahī vaqt gañvāne se rahe

ahl-e-pindār haiñ daryūza-garī kab hai qubūl

bhiik lene ko kisī dar pe to jaane se rahe

ek din qaid-e-qafas toḌ ke uḌ jā.eñge

qaid meñ rah ke abas shor machāne se rahe

jaag uTThe haiñ to ab jāgte rahnā hai hameñ

jāgtī āñkhoñ meñ ab ḳhvāb sajāne se rahe

daur-e-māzī ke ka.ī zaḳhm abhī taaza haiñ

ab koī dariyā nayā dil meñ basāne se rahe

is talātum meñ bhī dhāroñ ko nayā ruḳh deñge

lahr ke dosh pe ham ḳhud ko bahāne se rahe

kuchh 'ayāñ' ham bhī to pindār-e-vafā rakhte haiñ

be-sabab rūThne vāloñ ko manāne se rahe

jin ki tabir na ho KHwab wo aane se rahe

ye azab ab to hum aankhon mein basane se rahe

khol hi lenge fasilon mein nae dar hum log

lakh mahbus sahi waqt ganwane se rahe

ahl-e-pindar hain daryuza-gari kab hai qubul

bhik lene ko kisi dar pe to jaane se rahe

ek din qaid-e-qafas toD ke uD jaenge

qaid mein rah ke abas shor machane se rahe

jag uTThe hain to ab jagte rahna hai hamein

jagti aankhon mein ab KHwab sajaane se rahe

daur-e-mazi ke kai zaKHm abhi taza hain

ab koi dariya naya dil mein basane se rahe

is talatum mein bhi dhaaron ko naya ruKH denge

lahr ke dosh pe hum KHud ko bahane se rahe

kuchh 'ayan' hum bhi to pindar-e-wafa rakhte hain

be-sabab ruThne walon ko manane se rahe