jin mein kuchh lutf aur andaz-e-karam bhi kuchh hain

jin meñ kuchh lutf aur andāz-e-karam bhī kuchh haiñ

tum hī insāf se kah do sitam bhī kuchh haiñ

naaz tum ko hai jafā par to vafā par ham ko

tum agar kuchh ho mirī jaan to ham bhī kuchh haiñ

un kā ye qaul mire marne se kyā hotā hai

mujh ko da.avā hai mire dīda-e-nam bhī kuchh haiñ

jis ko dekho hai vahī banda-e-be-dām un kā

ai ḳhudā terī ḳhudā.ī meñ sanam bhī kuchh haiñ

hai abhī raah se guzrā koī maanā lekin

baat hī baat hai yā naqsh-e-qadam bhī kuchh haiñ

charḳh ke daur meñ yaksāñ nahīñ rahtā koī

rāhateñ thiiñ jinheñ kal tak unheñ ġham bhī kuchh haiñ

Turfa-tar hai tire maqtal kā tamāsha qātil

kuchh taḌapte haiñ tah-e-teġh-e-do-dam bhī kuchh haiñ

ḳhāna-e-dil meñ mire daulat-e-ulfat ke sivā

dāġh-hā-e-shab-e-furqat ke diram bhī kuchh haiñ

kuchh nahīñ kuchh nahīñ ai hazrat-e-'sābir' vo log

apne dil meñ jo samajhte haiñ ki ham bhī kuchh haiñ

jin mein kuchh lutf aur andaz-e-karam bhi kuchh hain

tum hi insaf se kah do sitam bhi kuchh hain

naz tum ko hai jafa par to wafa par hum ko

tum agar kuchh ho meri jaan to hum bhi kuchh hain

un ka ye qaul mere marne se kya hota hai

mujh ko dawa hai mere dida-e-nam bhi kuchh hain

jis ko dekho hai wahi banda-e-be-dam un ka

ai KHuda teri KHudai mein sanam bhi kuchh hain

hai abhi rah se guzra koi mana lekin

baat hi baat hai ya naqsh-e-qadam bhi kuchh hain

charKH ke daur mein yaksan nahin rahta koi

rahaten thin jinhen kal tak unhen gham bhi kuchh hain

Turfa-tar hai tere maqtal ka tamasha qatil

kuchh taDapte hain tah-e-tegh-e-do-dam bhi kuchh hain

KHana-e-dil mein mere daulat-e-ulfat ke siwa

dagh-ha-e-shab-e-furqat ke diram bhi kuchh hain

kuchh nahin kuchh nahin ai hazrat-e-'sabir' wo log

apne dil mein jo samajhte hain ki hum bhi kuchh hain