jinhen justuju-e-nashat thi wo isi hawas mein guzar gae

jinheñ justujū-e-nashāt thī vo isī havas meñ guzar ga.e

kahīñ phir ḳhushī na milī unheñ jo ġham-e-hayāt se Dar ga.e

mujhe rāh-e-shauq meñ chhoḌ kar vo nazar bachā ke guzar ga.e

mere saath the jo abhī abhī unheñ kyā huā vo kidhar ga.e

vo jo log kushta-e-nāz the yūñhī kar ke ziist basar ga.e

kabhī zauq-e-dīd meñ jī uThe kabhī shauq-e-dīd meñ mar ga.e

ye hijāb-e-husn kī shoḳhiyāñ haiñ ye khel jalva-e-nāz ke

kabhī merī āñkhoñ meñ bas ga.e kabhī mere dil meñ utar ga.e

unheñ ho bigaḌne kā ranj kyā unheñ kyoñ sañvarne kī ho ḳhushī

jo hazār baar bigaḌ ga.e jo hazār baar sañvar ga.e

hameñ āshiyāñ kā ghamanD thā unhīñ chaar tinkoñ pe dekhiye

ki jo tiin din bhī na rah sake vo havā chalī to bikhar ga.e

ye fusūñ-garī tire naam kī mujhe baat mil ga.ī kaam kī

tirā naam lab pe jo aa gayā mire bigḌe kaam sañvar ga.e

sar-o-barg-e-manzil-e-zīst kyā yūñhī ham ne apnī guzār dī

ki jahāñ milā koī aasrā vahīñ chaar din ko Thahar ga.e

ruḳh-e-zīst jis ne badal diyā huī jis se raunaq-e-zindagī

abhī merī bazm-e-ḳhayāl meñ vahī rang aa ke vo bhar ga.e

mire hāl-e-zār kī diid se ajab un kā haal thā bazm meñ

jo nazar paḌī to saham ga.e jo qarīb aa.e to Dar ga.e

vo jo āftāb-e-kamāl thā vahī nāgpūr meñ hai abhī

koī 'ḳhushtar' aa ke na jam sakā bahut aa.e ahl-e-hunar ga.e

jinhen justuju-e-nashat thi wo isi hawas mein guzar gae

kahin phir KHushi na mili unhen jo gham-e-hayat se Dar gae

mujhe rah-e-shauq mein chhoD kar wo nazar bacha ke guzar gae

mere sath the jo abhi abhi unhen kya hua wo kidhar gae

wo jo log kushta-e-naz the yunhi kar ke zist basar gae

kabhi zauq-e-did mein ji uThe kabhi shauq-e-did mein mar gae

ye hijab-e-husn ki shoKHiyan hain ye khel jalwa-e-naz ke

kabhi meri aankhon mein bas gae kabhi mere dil mein utar gae

unhen ho bigaDne ka ranj kya unhen kyon sanwarne ki ho KHushi

jo hazar bar bigaD gae jo hazar bar sanwar gae

hamein aashiyan ka ghamanD tha unhin chaar tinkon pe dekhiye

ki jo tin din bhi na rah sake wo hawa chali to bikhar gae

ye fusun-gari tere nam ki mujhe baat mil gai kaam ki

tera nam lab pe jo aa gaya mere bigDe kaam sanwar gae

sar-o-barg-e-manzil-e-zist kya yunhi hum ne apni guzar di

ki jahan mila koi aasra wahin chaar din ko Thahar gae

ruKH-e-zist jis ne badal diya hui jis se raunaq-e-zindagi

abhi meri bazm-e-KHayal mein wahi rang aa ke wo bhar gae

mere haal-e-zar ki did se ajab un ka haal tha bazm mein

jo nazar paDi to saham gae jo qarib aae to Dar gae

wo jo aaftab-e-kamal tha wahi nagpur mein hai abhi

koi 'KHushtar' aa ke na jam saka bahut aae ahl-e-hunar gae