jinhen nigah uThane mein bhi zamane lage

jinheñ nigāh uThāne meñ bhī zamāne lage

vo jā-ba-jā mirī tasvīr kyoñ sajāne lage

huā hai tai vo safar ek jast meñ mujh se

ki jis pe paañv bhī dharte tujhe zamāne lage

tire badan kī tabī.at se vāqafiyyat hai

maiñ jaan jā.ūñ agar mujh se tū chhupāne lage

ḳhudā kare ki kahīñ tujh ko terī fitrat sā

koī mile kabhī phir merī yaad aane lage

ye kaisā hijr hai jis par gumān vasl kā ho

tū mere paas rahe jab bhī uTh ke jaane lage

ye dil ajiib sā dil hai uThā ke dīvāreñ

tire ḳhayāl ke aate hī un ko Dhāne lage

tū apnī umr kī mahrūmiyāñ mujhe de de

maiñ chāhtī huuñ tirī ruuh muskurāne lage

jinhen nigah uThane mein bhi zamane lage

wo ja-ba-ja meri taswir kyon sajaane lage

hua hai tai wo safar ek jast mein mujh se

ki jis pe panw bhi dharte tujhe zamane lage

tere badan ki tabiat se waqafiyyat hai

main jaan jaun agar mujh se tu chhupane lage

KHuda kare ki kahin tujh ko teri fitrat sa

koi mile kabhi phir meri yaad aane lage

ye kaisa hijr hai jis par guman wasl ka ho

tu mere pas rahe jab bhi uTh ke jaane lage

ye dil ajib sa dil hai uTha ke diwaren

tere KHayal ke aate hi un ko Dhane lage

tu apni umr ki mahrumiyan mujhe de de

main chahti hun teri ruh muskurane lage