jis bagh ka pauda hai udhar kyon nahin lagta

jis baaġh kā paudā hai udhar kyoñ nahīñ lagtā

vo zaḳhm mujhe bār-e-digar kyoñ nahīñ lagtā

ham donoñ kī vīrānī bhī shāmil hai to ye dasht

kyoñ dasht nazar aatā hai ghar kyoñ nahīñ lagtā

vaise maiñ tamāshā to tujhe lagtā huuñ ab bhī

ik baar zarā dekh idhar kyoñ nahīñ lagtā

kyoñ ḳharch kiye jaatā huuñ terī bhī udāsī

ab terā zarar apnā zarar kyoñ nahīñ lagtā

ye an-chhue ehsās kī har por meñ gardish

is tarh hameñ zindagī bhar kyoñ nahīñ lagtā

achchhā dar-e-tanhā.ī khulā rahne duuñ yā'nī

dīvār se lag jā.ūñ magar kyoñ nahīñ lagtā

kyā hai ki kabhī phūloñ meñ Dhaltī nahīñ kaliyāñ

ye ġham kā shajar hai to samar kyoñ nahīñ lagtā

kyoñ ruuh nahīñ kāñptī kuchh soch ke 'shāriq'

Dartā huuñ ki ab hijr se Dar kyoñ nahīñ lagtā

jis bagh ka pauda hai udhar kyon nahin lagta

wo zaKHm mujhe bar-e-digar kyon nahin lagta

hum donon ki virani bhi shamil hai to ye dasht

kyon dasht nazar aata hai ghar kyon nahin lagta

waise main tamasha to tujhe lagta hun ab bhi

ek bar zara dekh idhar kyon nahin lagta

kyon KHarch kiye jata hun teri bhi udasi

ab tera zarar apna zarar kyon nahin lagta

ye an-chhue ehsas ki har por mein gardish

is tarh hamein zindagi bhar kyon nahin lagta

achchha dar-e-tanhai khula rahne dun ya'ni

diwar se lag jaun magar kyon nahin lagta

kya hai ki kabhi phulon mein Dhalti nahin kaliyan

ye gham ka shajar hai to samar kyon nahin lagta

kyon ruh nahin kanpti kuchh soch ke 'shaariq'

Darta hun ki ab hijr se Dar kyon nahin lagta