jis dar pe tera naqsh-e-kaf-e-pa na rahega

jis dar pe tirā naqsh-e-kaf-e-pā na rahegā

rindoñ ke liye qābil-e-sajdā na rahegā

jaatā to hai us jalva-gah-e-nāz meñ ai dil

kyā hogā agar zabt kā yaarā na rahegā

parvāne ko phūñkā hai to ai sham.a samajh le

terā bhī kaleja kabhī ThanDā na rahegā

dīvāne ko zanjīr se gahrā hai ta.alluq

kyuuñ us ko tirī zulf kā saudā na rahegā

parvarda-e-tūfāñ hai mire dil kā safīna

sāhil kī tarah ye lab-e-dariyā na rahegā

jhuñjhlā ke kahā us ne ye ā.īna paTak kar

muñh is meñ jo dekhegā vo yaktā na rahegā

marne kī adāoñ se nahīñ 'barq' jo vāqif

rahte hue zinda bhī vo zinda na rahegā

jis dar pe tera naqsh-e-kaf-e-pa na rahega

rindon ke liye qabil-e-sajda na rahega

jata to hai us jalwa-gah-e-naz mein ai dil

kya hoga agar zabt ka yara na rahega

parwane ko phunka hai to ai shama samajh le

tera bhi kaleja kabhi ThanDa na rahega

diwane ko zanjir se gahra hai talluq

kyun us ko teri zulf ka sauda na rahega

parwarda-e-tufan hai mere dil ka safina

sahil ki tarah ye lab-e-dariya na rahega

jhunjhla ke kaha us ne ye aaina paTak kar

munh is mein jo dekhega wo yakta na rahega

marne ki adaon se nahin 'barq' jo waqif

rahte hue zinda bhi wo zinda na rahega