jis jawan ke sine mein zalzale nahin hote

jis javāñ ke siine meñ zalzale nahīñ hote

us javāñ ke lahje meñ dabdabe nahīñ hote

ik zarā karo himmat duniyā-bhar ke mazlūmo

zālimoñ meñ dekhā hai hausle nahīñ hote

jang laḌnā paḌtī hai apne zor-e-bāzū par

zindagī ke maidāñ meñ mo'jize nahīñ hote

apnī apnī mehnat kā phal sabhī ko miltā hai

āsmāñ se qismat ke faisle nahīñ hote

jitne chāheñ daulat ke Dher bhī lagā leñ vo

be-zamīr logoñ ke martabe nahīñ hote

yā vo pakḌe jaate haiñ jo ki kuchh nahīñ karte

yā vo jin ke uupar tak rābte nahīñ hote

jo daraḳht ḳhālī hoñ phuul aur pattoñ se

un pe panchhiyoñ ke bhī ghoñsle nahīñ hote

bah rahā hai itnā ḳhuuñ shahr meñ ki lagtā hai

jangaloñ meñ ab shāyad bheḌiye nahīñ hote

jis jawan ke sine mein zalzale nahin hote

us jawan ke lahje mein dabdabe nahin hote

ek zara karo himmat duniya-bhar ke mazlumo

zalimon mein dekha hai hausle nahin hote

jang laDna paDti hai apne zor-e-bazu par

zindagi ke maidan mein mo'jize nahin hote

apni apni mehnat ka phal sabhi ko milta hai

aasman se qismat ke faisle nahin hote

jitne chahen daulat ke Dher bhi laga len wo

be-zamir logon ke martabe nahin hote

ya wo pakDe jate hain jo ki kuchh nahin karte

ya wo jin ke upar tak rabte nahin hote

jo daraKHt KHali hon phul aur patton se

un pe panchhiyon ke bhi ghonsle nahin hote

bah raha hai itna KHun shahr mein ki lagta hai

jangalon mein ab shayad bheDiye nahin hote