jis ka dil jam-e-fana se har ghaDi sarshaar hai

jis kā dil jām-e-fanā se har ghaḌī sarshār hai

us kī sūrat hai kahāñ vo sūrat-e-dildār hai

aisī tanhā.ī milī rāh-e-haqīqat meñ hameñ

yās-o-hasrat ke sivā koī nahīñ ġham-ḳhvār hai

ham to haiñ dair-o-haram meñ ek sūrat dekhiye

tum meñ ai shaiḳh-o-barahman kis liye takrār hai

kyoñ kiyā hai tū ne maiḳhāne ke darvāze ko band

aaj kyā aaya nahīñ saaqī koī mai-ḳhvār hai

sar ko na kaTvātā gar ramz-e-fanā ko jāntā

kab kamāl-e-ishq meñ mansūr tū hoshiyār hai

jis ko āzādī milī hai ishq meñ phir vo mudām

ka.aba-o-but-ḳhāna meñ phirtā qalandar-vār hai

qum bi-iznī shams-e-dīñ kā haq hai kahnā ai 'asad'

ġhain jab ġham ho ga.ī tab ain kā iz.hār hai

jis ka dil jam-e-fana se har ghaDi sarshaar hai

us ki surat hai kahan wo surat-e-dildar hai

aisi tanhai mili rah-e-haqiqat mein hamein

yas-o-hasrat ke siwa koi nahin gham-KHwar hai

hum to hain dair-o-haram mein ek surat dekhiye

tum mein ai shaiKH-o-barahman kis liye takrar hai

kyon kiya hai tu ne maiKHane ke darwaze ko band

aaj kya aaya nahin saqi koi mai-KHwar hai

sar ko na kaTwata gar ramz-e-fana ko jaanta

kab kamal-e-ishq mein mansur tu hoshiyar hai

jis ko aazadi mili hai ishq mein phir wo mudam

kaba-o-but-KHana mein phirta qalandar-war hai

qum bi-izni shams-e-din ka haq hai kahna ai 'asad'

ghain jab gham ho gai tab ain ka izhaar hai