jis ka mujhe arman hai wo aksar nahin milta

jis kā mujhe armāñ hai vo aksar nahīñ miltā

maiñ hosh meñ huuñ aur mujhe ghar nahīñ miltā

insān se ruḳhsat huā me.ār-e-fazīlat

dastār to lākhoñ haiñ magar sar nahīñ miltā

peshāniyāñ DhūñDeñ to kahāñ apnā Thikāna

sajdoñ kā jo markaz thā vahī dar nahīñ miltā

jo chāhe sune hai ye mire qalb kī āvāz

jo haq hai mirā sab ke barābar nahīñ miltā

jab tak talab-e-sabr thī dil ne na diyā saath

ab zauq-e-sitam hai to sitamgar nahīñ miltā

dīvāngī-e-shauq kā kaise ho nazāra

sar phoḌnā chāhūñ bhī to patthar nahīñ miltā

tum ko to 'habīb' us ne sadā dī hai ka.ī baar

aisā to kisī ko bhī muqaddar nahīñ miltā

jis ka mujhe arman hai wo aksar nahin milta

main hosh mein hun aur mujhe ghar nahin milta

insan se ruKHsat hua mear-e-fazilat

dastar to lakhon hain magar sar nahin milta

peshaniyan DhunDen to kahan apna Thikana

sajdon ka jo markaz tha wahi dar nahin milta

jo chahe sune hai ye mere qalb ki aawaz

jo haq hai mera sab ke barabar nahin milta

jab tak talab-e-sabr thi dil ne na diya sath

ab zauq-e-sitam hai to sitamgar nahin milta

diwangi-e-shauq ka kaise ho nazara

sar phoDna chahun bhi to patthar nahin milta

tum ko to 'habib' us ne sada di hai kai bar

aisa to kisi ko bhi muqaddar nahin milta