jis ke dil mein ishq ka jazba nahin

jis ke dil meñ 'ishq kā jazba nahīñ

zindagī kā raaz vo samjhā nahīñ

shoḳhiyāñ naḳhre aur un kā bāñkpan

bhūlnā chāhā magar bhūlā nahīñ

mandir-o-masjid se uThtā hai dhuāñ

ghar meñ hai do vaqt kā aaTā nahīñ

jis ko dekho vo pareshāñ-hāl hai

mutma.in miltā koī chehra nahīñ

mujrim-o-munsif jahāñ par ek hoñ

faisla haq kā vahāñ hotā nahīñ

muflisī samjhegā kyā jis ne kabhī

muflisī kā zā.iqa chakkhā nahīñ

ḳhuun ke rishte bhī sab be-faiz haiñ

jeb meñ gar aap ke paisa nahīñ

roz mil kar aap se lagtā hai kyoñ

muddatoñ se aap ko dekhā nahīñ

ab 'kashish' ko aur kyā samjhe koī

aap hī ne jab use samjhā nahīñ

jis ke dil mein 'ishq ka jazba nahin

zindagi ka raaz wo samjha nahin

shoKHiyan naKHre aur un ka bankpan

bhulna chaha magar bhula nahin

mandir-o-masjid se uThta hai dhuan

ghar mein hai do waqt ka aaTa nahin

jis ko dekho wo pareshan-haal hai

mutmain milta koi chehra nahin

mujrim-o-munsif jahan par ek hon

faisla haq ka wahan hota nahin

muflisi samjhega kya jis ne kabhi

muflisi ka zaiqa chakkha nahin

KHun ke rishte bhi sab be-faiz hain

jeb mein gar aap ke paisa nahin

roz mil kar aap se lagta hai kyon

muddaton se aap ko dekha nahin

ab 'kashish' ko aur kya samjhe koi

aap hi ne jab use samjha nahin