jis ke hathon mein hua tha sang-rezon ka shikar

jis ke hāthoñ meñ huā thā sang-rezoñ kā shikār

aaj vo bhī ho gayā apne gunāhoñ kā shikār

aur kitne din mirī nazroñ ko tum doge fareb

aur kitne din rahūñgā maiñ tilismoñ kā shikār

bad-gumāñ jis se rahā kartī thī sūraj kī kiran

ho gayā vo peḌ bhī kaalī ghaTāoñ kā shikār

chal paḌe haiñ log mujh ko le ke suulī kī taraf

āḳhirash maiñ ho gayā apne usūloñ kā shikār

apnī shohrat kā mujhe us vaqt andāza huā

shaḳhsiyat merī huī jab nukta-chīnī kā shikār

sar kaTī lāsheñ mileñgī tum ko har ik moḌ par

raushnī ho jā.egī jis dam añdheroñ kā shikār

'badr' terā shukriya ki tū bhī mere saath hai

maiñ akelā hī nahīñ jhūTī umīdoñ kā shikār

jis ke hathon mein hua tha sang-rezon ka shikar

aaj wo bhi ho gaya apne gunahon ka shikar

aur kitne din meri nazron ko tum doge fareb

aur kitne din rahunga main tilismon ka shikar

bad-guman jis se raha karti thi suraj ki kiran

ho gaya wo peD bhi kali ghaTaon ka shikar

chal paDe hain log mujh ko le ke suli ki taraf

aaKHirash main ho gaya apne usulon ka shikar

apni shohrat ka mujhe us waqt andaza hua

shaKHsiyat meri hui jab nukta-chini ka shikar

sar kaTi lashen milengi tum ko har ek moD par

raushni ho jaegi jis dam andheron ka shikar

'badr' tera shukriya ki tu bhi mere sath hai

main akela hi nahin jhuTi umidon ka shikar