jis ki jo hai talab tamasha hai

jis kī jo hai talab tamāsha hai

ye bhī kitnā ajab tamāsha hai

aañkh īmān laa.ī manzar par

dil ye kahtā hai sab tamāsha hai

maiñ ne duniyā ke rang dekhe haiñ

mere aage ye sab tamāsha hai

dekhte haiñ jo ham kisī kī taraf

dekhne kā sabab tamāsha hai

vo bhī dikhlā.e jo ki hai hī nahīñ

terī duniyā ajab tamāsha hai

lā-makāñ se ye dahr tak kā safar

tab tamāsha thā ab tamāsha hai

jo thā jiinā adan meñ jī aa.e

zindagī kyā hai ab tamāshā hai

bāb-e-ālam meñ kun kahā pahle

phir kahā zer-e-lab tamāshā hai

kyoñ sar-e-tūr dekhne jaa.eñ

tere jaisā vo kab tamāshā hai

kyoñ na āḳhir hoñ tujh se dād-talab

ham ko karnā hī jab tamāsha hai

sochiye to tamāsha-e-hastī

kis qadar be-sabab tamāsha hai

mā-sivā diid jis meñ tū ho faqat

baaqī jo kuchh hai sab tamāsha hai

parda-dārī se kaam kyā liije

'shams' honā hī jab tamāsha hai

jis ki jo hai talab tamasha hai

ye bhi kitna ajab tamasha hai

aankh iman lai manzar par

dil ye kahta hai sab tamasha hai

main ne duniya ke rang dekhe hain

mere aage ye sab tamasha hai

dekhte hain jo hum kisi ki taraf

dekhne ka sabab tamasha hai

wo bhi dikhlae jo ki hai hi nahin

teri duniya ajab tamasha hai

la-makan se ye dahr tak ka safar

tab tamasha tha ab tamasha hai

jo tha jina adan mein ji aae

zindagi kya hai ab tamasha hai

bab-e-alam mein kun kaha pahle

phir kaha zer-e-lab tamasha hai

kyon sar-e-tur dekhne jaen

tere jaisa wo kab tamasha hai

kyon na aaKHir hon tujh se dad-talab

hum ko karna hi jab tamasha hai

sochiye to tamasha-e-hasti

kis qadar be-sabab tamasha hai

ma-siwa did jis mein tu ho faqat

baqi jo kuchh hai sab tamasha hai

parda-dari se kaam kya lije

'shams' hona hi jab tamasha hai