jis ko batlaya ki ye ghar hai ye aangan hai mera

jis ko batlāyā ki ye ghar hai ye āñgan hai mirā

mujh ko ma.alūm nahīñ thā ki vo dushman hai mirā

mirī kuTiyā hī tujhe shahr meñ achchhī na lagī

maiñ baḌe naaz se kahtā thā ki sāvan hai mirā

mujh ko ḳhairāt na de par mirā kashkol na toḌ

āḳhirī fard huuñ maiñ āḳhirī bartan hai mirā

aaj lauTā do buḌhāpe ne use dekhnā hai

terī dīvār pe rakkhā huā bachpan hai mirā

chand tinke jo sar-e-shāḳh-e-shajar lipTe haiñ

tujh ko ma.alūm hai ai barq nasheman hai mirā

ek lamha bhī zarūrat ne sañbhalne na diyā

kis ke darvāze pe phailā huā dāman hai mirā

kam-sinī qasr ke bachchoñ meñ kahīñ bhuul aaya

ye kisī aur kā khelā huā bachpan hai mirā

jis ko batlaya ki ye ghar hai ye aangan hai mera

mujh ko malum nahin tha ki wo dushman hai mera

meri kuTiya hi tujhe shahr mein achchhi na lagi

main baDe naz se kahta tha ki sawan hai mera

mujh ko KHairaat na de par mera kashkol na toD

aaKHiri fard hun main aaKHiri bartan hai mera

aaj lauTa do buDhape ne use dekhna hai

teri diwar pe rakkha hua bachpan hai mera

chand tinke jo sar-e-shaKH-e-shajar lipTe hain

tujh ko malum hai ai barq nasheman hai mera

ek lamha bhi zarurat ne sanbhalne na diya

kis ke darwaze pe phaila hua daman hai mera

kam-sini qasr ke bachchon mein kahin bhul aaya

ye kisi aur ka khela hua bachpan hai mera