jis ko bhi dekha tere husn pe mail dekha

jis ko bhī dekhā tire husn pe maa.il dekhā

koī nākām-e-tamannā koī bismil dekhā

jaan parvāne ne dī sham.a pe jal kar jis vaqt

ham ne us vaqt tanaffur se sū-e-dil dekhā

vo na aa.e the shab-e-va.ada magar aanā paḌā

kyā asar laayā mirā jazba-e-kāmil dekhā

ham ne maanā ki hameñ bhuul gayā bhuul gayā

dil ko lekin na tirī yaad se ġhāfil dekhā

laakh tūfān-e-havādis meñ rahī kashti-e-dil

maiñ ne muḌ kar na kabhī jānib-e-sāhil dekhā

umr bhar ishq meñ jaañ koī hai lekin 'jauhar'

juz ġham-e-ishq na kuchh ishq kā hāsil dekhā

jis ko bhi dekha tere husn pe mail dekha

koi nakaam-e-tamanna koi bismil dekha

jaan parwane ne di shama pe jal kar jis waqt

hum ne us waqt tanaffur se su-e-dil dekha

wo na aae the shab-e-wada magar aana paDa

kya asar laya mera jazba-e-kaamil dekha

hum ne mana ki hamein bhul gaya bhul gaya

dil ko lekin na teri yaad se ghafil dekha

lakh tufan-e-hawadis mein rahi kashti-e-dil

main ne muD kar na kabhi jaanib-e-sahil dekha

umr bhar ishq mein jaan koi hai lekin 'jauhar'

juz gham-e-ishq na kuchh ishq ka hasil dekha