jis ko dekho jis ko parkho lagta hai begana sa

jis ko dekho jis ko parkho lagtā hai begāna sā

maazī ko sab bhuul chuke haiñ maazī hai afsāna sā

nāzuk gardan patlī kamar thī chaal thī us kī matvālī

āñkheñ nargis ko sharmā.eñ mukhḌā ma.asūmāna sā

zulfeñ jaise kaalī ghaTā ho abrū us ke ḳhanjar se

phuul kī pattī lab the us ke qadd-o-qāmat miyāna sā

dandāñ motī kī laḌiyāñ thiiñ ḳhaal thā gaal pe haa.e ġhazab

bāteñ us kī mīThī mīThī lahja thā mastāna sā

sab kuchh to maiñ bhuul chukā huuñ lekin ye kaise bhūlūñ

sham.a kī sūrat vo thā hamdam aur maiñ thā parvāna sā

kaise khileñ ummīd kī kaliyāñ kaise vo rut aa.e phir

kaise phalegā naḳhl-e-tamannā dil ho jab vīrāna sā

kitnī tasvīreñ haiñ kanda dil meñ ki bas allāh allāh

kuchh kuchh ka.aba sā lagtā hai kuchh kuchh hai but-ḳhāna sā

ġhair to ġhair hai avval-o-āḳhir ġhair kā kyā shikva kiije

mujh ko to is soch ne maarā dil kyoñ hai begāna sā

uljhe uljhe us ke gesū chehre par vahshat taarī

aisā lagtā hai ab 'ḳhāvar' jaise ho dīvāna sā

jis ko dekho jis ko parkho lagta hai begana sa

mazi ko sab bhul chuke hain mazi hai afsana sa

nazuk gardan patli kamar thi chaal thi us ki matwali

aankhen nargis ko sharmaen mukhDa masumana sa

zulfen jaise kali ghaTa ho abru us ke KHanjar se

phul ki patti lab the us ke qadd-o-qamat miyana sa

dandan moti ki laDiyan thin KHal tha gal pe hae ghazab

baaten us ki miThi miThi lahja tha mastana sa

sab kuchh to main bhul chuka hun lekin ye kaise bhulun

shama ki surat wo tha hamdam aur main tha parwana sa

kaise khilen ummid ki kaliyan kaise wo rut aae phir

kaise phalega naKHl-e-tamanna dil ho jab virana sa

kitni taswiren hain kanda dil mein ki bas allah allah

kuchh kuchh kaba sa lagta hai kuchh kuchh hai but-KHana sa

ghair to ghair hai awwal-o-aKHir ghair ka kya shikwa kije

mujh ko to is soch ne mara dil kyon hai begana sa

uljhe uljhe us ke gesu chehre par wahshat tari

aisa lagta hai ab 'KHawar' jaise ho diwana sa