jis ko ho KHud talash kisi saeban ki

jis ko ho ḳhud talāsh kisī sā.ebān kī

dīvār kyā banegā vo girte makān kī

miTTī paḌī huī hai ta.assub kī aañkh meñ

vo qadr kyā karegā hamārī uḌaan kī

dekheñge kis ke dil meñ gulistāñ kā dard hai

ham chāhte haiñ aa.e ghaḌī imtihān kī

us kī nigāh daulat-e-duniyā pe ruk ga.ī

jis ko faqat hai fikr isī ik jahān kī

vo log bhī yahīñ pe zamīñ-bos ho ga.e

jin kī haveliyāñ thiiñ baḌī ān-bān kī

jin kī ināyatoñ se gulistāñ ujaḌ gayā

un par nahīñ nigāh mire pāsbān kī

'muztar' unhīñ ko miltī haiñ manzil kī ne.amateñ

karte nahīñ jo baat safar meñ thakān kī

jis ko ho KHud talash kisi saeban ki

diwar kya banega wo girte makan ki

miTTi paDi hui hai tassub ki aankh mein

wo qadr kya karega hamari uDan ki

dekhenge kis ke dil mein gulistan ka dard hai

hum chahte hain aae ghaDi imtihan ki

us ki nigah daulat-e-duniya pe ruk gai

jis ko faqat hai fikr isi ek jahan ki

wo log bhi yahin pe zamin-bos ho gae

jin ki haweliyan thin baDi aan-ban ki

jin ki inayaton se gulistan ujaD gaya

un par nahin nigah mere pasban ki

'muztar' unhin ko milti hain manzil ki neamaten

karte nahin jo baat safar mein thakan ki