jis ko kahte hain qaza ya maut jis ka nam hai

jis ko kahte haiñ qazā yā maut jis kā naam hai

vāqa.ī vo dā.imī rāhat kā ik paiġhām hai

iltizām-e-chārasāzī ik ḳhayāl-e-ḳhām hai

chāragar mere liye taklīf meñ ārām hai

uf re ye begānagī hamdard ho to kaun ho

ek dil thā vo bhī sarf-e-kasrat-e-ālām hai

arsa-e-rafta pe nazreñ paḌ rahī haiñ vahm kī

ḳhvāb kī tasvīr hai yā zindagī kī shaam hai

apnī hastī kā bhī ab aatā nahīñ mujh ko yaqīñ

al-hazar kaisā junūn-e-shauq kā anjām hai

ye haqīqat hai ki donoñ fitratan ma.asūm haiñ

pāk-dāman husn bhī hai ishq bhī ḳhush-nām hai

dekhte hī ruuh meñ ik kaifiyat sī aa ga.ī

sāqiyā kyā bāda-e-rañgīñ kā pyārā jaam hai

ab to 'fā.iq' aur bhī mushkil se kuchh kaTne lagī

ishq bhī taskīn-e-ḳhātir ke liye nākām hai

jis ko kahte hain qaza ya maut jis ka nam hai

waqai wo daimi rahat ka ek paigham hai

iltizam-e-chaarasazi ek KHayal-e-KHam hai

chaaragar mere liye taklif mein aaram hai

uf re ye beganagi hamdard ho to kaun ho

ek dil tha wo bhi sarf-e-kasrat-e-alam hai

arsa-e-rafta pe nazren paD rahi hain wahm ki

KHwab ki taswir hai ya zindagi ki sham hai

apni hasti ka bhi ab aata nahin mujh ko yaqin

al-hazar kaisa junun-e-shauq ka anjam hai

ye haqiqat hai ki donon fitratan masum hain

pak-daman husn bhi hai ishq bhi KHush-nam hai

dekhte hi ruh mein ek kaifiyat si aa gai

saqiya kya baada-e-rangin ka pyara jam hai

ab to 'faiq' aur bhi mushkil se kuchh kaTne lagi

ishq bhi taskin-e-KHatir ke liye nakaam hai