jis ko sau aasaniyan thin wo bhi kuchh mushkil mein hai

jis ko sau āsāniyāñ thiiñ vo bhī kuchh mushkil meñ hai

maiñ samajhtā huuñ tumhārā dil bhī mere dil meñ hai

jazba-e-dard-e-mohabbat ko musalsal dekh kar

pūchhtā phirtā huuñ duniyā kaun sī manzil meñ hai

zab.h kartā hai mujhe rotā hai mere haal par

merī fitrat bhī ḳhudā rakkhe mire qātil meñ hai

bandagī kā haq batātā huuñ ḳhudāvandī ko maiñ

haath phailāne kā dhabba dāman-e-sā.il meñ hai

yaad kar zālim mire dil kā taḌapnā yaad kar

hairat-e-jalva kā sannāTā tirī mahfil meñ hai

sa.ī-e-hāsil meñ bhī ik lazzat hai do din chaar din

pūchhiye ham se mazā jo sa.i-e-lā-hāsil meñ hai

marhabā zauq-e-asīrī qudrat-e-fikr-o-nazar

dahne baa.eñ jis ko dekhā qaid āb-o-gil meñ hai

ye duā māñgī mire dil meñ na ho kuchh inqalāb

inqilāb-e-dahr shāmil inqalāb-e-dil meñ hai

dūsrī duniyā se kyoñ aa.e payām-e-zindagī

ruuh apnī koshisheñ āzādi-e-kāmil meñ hai

'najm' ye ḳhanda-jabīnī har balā-e-ishq par

kis tabassum kā ḳhazāna mere āb-o-gil meñ hai

jis ko sau aasaniyan thin wo bhi kuchh mushkil mein hai

main samajhta hun tumhaara dil bhi mere dil mein hai

jazba-e-dard-e-mohabbat ko musalsal dekh kar

puchhta phirta hun duniya kaun si manzil mein hai

zabh karta hai mujhe rota hai mere haal par

meri fitrat bhi KHuda rakkhe mere qatil mein hai

bandagi ka haq batata hun KHudawandi ko main

hath phailane ka dhabba daman-e-sail mein hai

yaad kar zalim mere dil ka taDapna yaad kar

hairat-e-jalwa ka sannaTa teri mahfil mein hai

sai-e-hasil mein bhi ek lazzat hai do din chaar din

puchhiye hum se maza jo sai-e-la-hasil mein hai

marhaba zauq-e-asiri qudrat-e-fikr-o-nazar

dahne baen jis ko dekha qaid aab-o-gil mein hai

ye dua mangi mere dil mein na ho kuchh inqalab

inqilab-e-dahr shamil inqalab-e-dil mein hai

dusri duniya se kyon aae payam-e-zindagi

ruh apni koshishen aazadi-e-kaamil mein hai

'najm' ye KHanda-jabini har bala-e-ishq par

kis tabassum ka KHazana mere aab-o-gil mein hai