jis ne baKHshi hai fughan usko suna bhi na sakun

jis ne baḳhshī hai fuġhāñ us ko sunā bhī na sakūñ

kaisā naġhma hai jise saaz pe gā bhī na sakūñ

dil meñ ik is ke sivā dūsrī tasvīr nahīñ

us ke ā.īne ko us ko hī dikhā bhī na sakūñ

tum anā chhoḌ ke aao to bhulā duuñ har rañj

harf qismat kā nahīñ huuñ ki miTā bhī na sakūñ

soch le ab bhī tere haath hai donoñ kā sakūñ

varna mumkin hai kabhī lauT ke aa bhī na sakūñ

haa.e pābandī-e-bechārgī-e-ahd-e-vafā

zaḳhm us ke hī use gin ke batā bhī na sakūñ

vo to qatroñ ko bhī tarsātā hai dariyā ho kar

aag jo dil meñ lagī hai vo bujhā bhī na sakūñ

bojh aisā hai gunāhoñ kā ki jis ko 'sāhil'

apne kamzor se kāñdhoñ pe uThā bhī na sakūñ

jis ne baKHshi hai fughan us ko suna bhi na sakun

kaisa naghma hai jise saz pe ga bhi na sakun

dil mein ek is ke siwa dusri taswir nahin

us ke aaine ko us ko hi dikha bhi na sakun

tum ana chhoD ke aao to bhula dun har ranj

harf qismat ka nahin hun ki miTa bhi na sakun

soch le ab bhi tere hath hai donon ka sakun

warna mumkin hai kabhi lauT ke aa bhi na sakun

hae pabandi-e-bechaargi-e-ahd-e-wafa

zaKHm us ke hi use gin ke bata bhi na sakun

wo to qatron ko bhi tarsata hai dariya ho kar

aag jo dil mein lagi hai wo bujha bhi na sakun

bojh aisa hai gunahon ka ki jis ko 'sahil'

apne kamzor se kandhon pe uTha bhi na sakun