jis ne chhupa ke bhuk ko patthar mein rakh liya

jis ne chhupā ke bhuuk ko patthar meñ rakh liyā

duniyā ko is faqīr ne Thokar meñ rakh liyā

ahl-e-junūñ ko apne junūñ se vo ishq thā

dil ne jagah na dī to use sar meñ rakh liyā

nanhā koī parind uḌā jab to yuuñ lagā

himmat ne āsmān ko shahpar meñ rakh liyā

āñkhoñ ne āñsuoñ ko ajab ehtimām se

motī banā ke dil ke samundar meñ rakh liyā

ham ne tumhārī diid ke lamhe sameT kar

phir se purāne ḳhvāb kī chādar meñ rakh liyā

kyā Dar samā gayā ki hamāre harīf ne

tum jaise shahsavār ko lashkar meñ rakh liyā

kuchh baat thī jo ham ne sitāroñ ke darmiyāñ

un āñsuoñ ko raat ke manzar meñ rakh liyā

āñkheñ thakīñ to dil ne sahārā diyā 'fahīm'

ham ne kisī kā aks na.e ghar meñ rakh liyā

jis ne chhupa ke bhuk ko patthar mein rakh liya

duniya ko is faqir ne Thokar mein rakh liya

ahl-e-junun ko apne junun se wo ishq tha

dil ne jagah na di to use sar mein rakh liya

nanha koi parind uDa jab to yun laga

himmat ne aasman ko shahpar mein rakh liya

aankhon ne aansuon ko ajab ehtimam se

moti bana ke dil ke samundar mein rakh liya

hum ne tumhaari did ke lamhe sameT kar

phir se purane KHwab ki chadar mein rakh liya

kya Dar sama gaya ki hamare harif ne

tum jaise shahsawar ko lashkar mein rakh liya

kuchh baat thi jo hum ne sitaron ke darmiyan

un aansuon ko raat ke manzar mein rakh liya

aankhen thakin to dil ne sahaara diya 'fahim'

hum ne kisi ka aks nae ghar mein rakh liya