jis ne nahin dukh hasti mein saha dukh-dard ki baaten kya jaane

jis ne nahīñ dukh hastī meñ sahā dukh-dard kī bāteñ kyā jaane

ġhurbat ke alam meñ TuuTī chhat bhīgī barsāteñ kyā jaane

us nuur kā jo bhī munkir hai andhā hai añdhere kā baasī

vo shams-o-qamar ko kyā jaane tāroñ kī barāteñ kyā jaane

jo sūd-o-ziyāñ kā banda hai dil us kā havas kā phandā hai

insāñ se muravvat kyā jaane dukh kī sauġhāteñ kyā jaane

kuchh mīr-e-haram meñ naḳhvat thī kuchh kor-basīrat bhī thā vo

pahchān na ho dushman kī jise dushman kī vo ghāteñ kyā jaane

vo haar ke baazī jiit gayā maiñ jiit ke sab kuchh haar ga.ī

mujh aisī sāda-dil laḌkī bāzī-o-bisāteñ kyā jaane

kuchh dukh to mile taqdīr se the kuchh us par izāfa us ne kiyā

vo shahr-e-nigārāñ kā baasī suulī pe ye rāteñ kyā jaane

jis ne nahin dukh hasti mein saha dukh-dard ki baaten kya jaane

ghurbat ke alam mein TuTi chhat bhigi barsaten kya jaane

us nur ka jo bhi munkir hai andha hai andhere ka basi

wo shams-o-qamar ko kya jaane taron ki baraaten kya jaane

jo sud-o-ziyan ka banda hai dil us ka hawas ka phanda hai

insan se murawwat kya jaane dukh ki saughaten kya jaane

kuchh mir-e-haram mein naKHwat thi kuchh kor-basirat bhi tha wo

pahchan na ho dushman ki jise dushman ki wo ghaten kya jaane

wo haar ke bazi jit gaya main jit ke sab kuchh haar gai

mujh aisi sada-dil laDki bazi-o-bisaten kya jaane

kuchh dukh to mile taqdir se the kuchh us par izafa us ne kiya

wo shahr-e-nigaran ka basi suli pe ye raaten kya jaane