jis pal maine ghar ki imarat KHwab-asar banai thi

jis pal maiñ ne ghar kī imārat ḳhvāb-āsār banā.ī thī

us lamhe vīrānī ne bhī ik raftār banā.ī thī

ham ne hī mahr ko zahr se badlā varna zamīñ kī gardish ne

din ġham-ḳhvār banāyā thā aur shab dildār banā.ī thī

TuuTe dil palkoñ se sambhāleñ ab aise fankār kahāñ

varna ye duniyā jab ujḌī thī sau sau baar banā.ī thī

apnī raah ke saare kāñTe maiñ ne aap hī bo.e the

varna ḳhvāb-e-azal ne duniyā kam-āzār banā.ī thī

kūcha kūcha mātam hogā galiyoñ galiyoñ vāvailā

is par pahle kyuuñ nahīñ sochā jab dastār banā.ī thī

kab tak ek hī manzar chunte apnī anā ke zindānī

aaj usī meñ dar māñgeñ haiñ jo dīvār banā.ī thī

jis pal main ne ghar ki imarat KHwab-asar banai thi

us lamhe virani ne bhi ek raftar banai thi

hum ne hi mahr ko zahr se badla warna zamin ki gardish ne

din gham-KHwar banaya tha aur shab dildar banai thi

TuTe dil palkon se sambhaalen ab aise fankar kahan

warna ye duniya jab ujDi thi sau sau bar banai thi

apni rah ke sare kanTe main ne aap hi boe the

warna KHwab-e-azal ne duniya kam-azar banai thi

kucha kucha matam hoga galiyon galiyon wawaila

is par pahle kyun nahin socha jab dastar banai thi

kab tak ek hi manzar chunte apni ana ke zindani

aaj usi mein dar mangen hain jo diwar banai thi