jis par dil rota hai wo bhi hans kar karna paDta hai

jis par dil rotā hai vo bhī hañs kar karnā paḌtā hai

apne ghar kī raunaq ko ḳhud be-ghar karnā paḌtā hai

achchhe achchhe dab jaate haiñ rasm-e-zamāna ke aage

dekh ke chup rahte haiñ dil ko patthar karnā paḌtā hai

aane vaale din kī fikreñ ḳhvāboñ ko Das letī haiñ

niiñd se jaltī āñkhoñ ko be-manzar karnā paḌtā hai

chāhne aur chāhe jaane kī ḳhvāhish jurm nahīñ lekin

rusvā.ī ko apne sar kī chādar karnā paḌtā hai

aise moḌ pe aa jaatī hai baḌhte baḌhte baat kabhī

phuul se lahje ko majbūran ḳhanjar karnā paḌtā hai

raat parā.e des meñ kaaTī to ye bhī ma.alūm huā

haath ko takiya aur zamīñ ko bistar karnā paḌtā hai

jī kahtā hai rad kar duuñ maiñ aise ḳhvāboñ ko 'ma.asūm'

jin kī ta.abīroñ par mātam aksar karnā paḌtā hai

jis par dil rota hai wo bhi hans kar karna paDta hai

apne ghar ki raunaq ko KHud be-ghar karna paDta hai

achchhe achchhe dab jate hain rasm-e-zamana ke aage

dekh ke chup rahte hain dil ko patthar karna paDta hai

aane wale din ki fikren KHwabon ko Das leti hain

nind se jalti aankhon ko be-manzar karna paDta hai

chahne aur chahe jaane ki KHwahish jurm nahin lekin

ruswai ko apne sar ki chadar karna paDta hai

aise moD pe aa jati hai baDhte baDhte baat kabhi

phul se lahje ko majburan KHanjar karna paDta hai

raat parae des mein kaTi to ye bhi malum hua

hath ko takiya aur zamin ko bistar karna paDta hai

ji kahta hai rad kar dun main aise KHwabon ko 'masum'

jin ki tabiron par matam aksar karna paDta hai