jis qadar zabt kiya aur bhi rona aaya

jis qadar zabt kiyā aur bhī ronā aayā

ye tabī.at nahīñ aa.ī koī dariyā aayā

kaam kyā jazb-e-tamannā-e-zuleḳhā aayā

kārvāñ bhī chah-e-yūsuf hī pe hotā aayā

kūcha-e-yār meñ aa kar nahīñ jaatā koī

ye vo jā hai ki yahāñ jo koī aayā aayā

raat kyā jāniye kis tarah guzārī ham ne

apne va.ade pe shab-e-va.ada to achchhā aayā

aa ga.e aaj vo aġhyār ke bahkāne meñ

nahīñ ma.alūm burā vaqt ye kis kā aayā

kashish-e-shauq ne majbūr kiyā hai sau baar

maiñ to vaañ jaane kī har baar qasam khā aayā

haath donoñ na hue siine se ik jaa.e judā

maiñ chaman meñ dil-e-nāshād ko bahlā aayā

vaañ se ye shakl banā.e hue aayā qāsid

maiñ ne jaanā mujhe paiġhām qazā kā aayā

ham ne dar-parda bhī kī terī burā.ī na kabhī

shukr kah kar bhī na lab par koī shikvā aayā

va.ada-e-vasl pe qasmeñ to na khā ahd-shikan

bāvar aayā mujhe bas aur to aayā aayā

kah uThā aaj ki us but ko ḳhudā laa.e kahīñ

shukr hai lab pe mire naam ḳhudā kā aayā

fitne qadmoñ se lage rahte haiñ goyā har-dam

aap kyā aa.e ki ik majma-e-ādā aayā

ashk āñkhoñ meñ bhare lab pe fuġhāñ dāman-e-chāk

jo tamāshe ko gayā vaañ se tamāshā aayā

girye ko zabt kiyā ruk na sake naale aah

TukḌe ho ho ke mire muñh ko kaleja aayā

jis ne dekhā mujhe fariyād-kunāñ vaañ 'sālik'

rahm kaisā vo burā mujh ko hī kahtā aayā

jis qadar zabt kiya aur bhi rona aaya

ye tabiat nahin aai koi dariya aaya

kaam kya jazb-e-tamanna-e-zuleKHa aaya

karwan bhi chah-e-yusuf hi pe hota aaya

kucha-e-yar mein aa kar nahin jata koi

ye wo ja hai ki yahan jo koi aaya aaya

raat kya jaaniye kis tarah guzari hum ne

apne wade pe shab-e-wada to achchha aaya

aa gae aaj wo aghyar ke bahkane mein

nahin malum bura waqt ye kis ka aaya

kashish-e-shauq ne majbur kiya hai sau bar

main to wan jaane ki har bar qasam kha aaya

hath donon na hue sine se ek jae juda

main chaman mein dil-e-nashad ko bahla aaya

wan se ye shakl banae hue aaya qasid

main ne jaana mujhe paigham qaza ka aaya

hum ne dar-parda bhi ki teri burai na kabhi

shukr kah kar bhi na lab par koi shikwa aaya

wada-e-wasl pe qasmen to na kha ahd-shikan

bawar aaya mujhe bas aur to aaya aaya

kah uTha aaj ki us but ko KHuda lae kahin

shukr hai lab pe mere nam KHuda ka aaya

fitne qadmon se lage rahte hain goya har-dam

aap kya aae ki ek majma-e-ada aaya

ashk aankhon mein bhare lab pe fughan daman-e-chaak

jo tamashe ko gaya wan se tamasha aaya

girye ko zabt kiya ruk na sake nale aah

TukDe ho ho ke mere munh ko kaleja aaya

jis ne dekha mujhe fariyaad-kunan wan 'salik'

rahm kaisa wo bura mujh ko hi kahta aaya