jis roz se qirtas pe tahrir hain aankhen

jis roz se qirtās pe tahrīr haiñ āñkheñ

us roz se lagtā hai ki tasvīr haiñ āñkheñ

chehre haiñ sabhī ek se gar shahr-e-vafā meñ

phir tum hī kaho kis kī ye tafsīr haiñ āñkheñ

apnoñ ne mujhe lams kī tablīġh se rokā

ḳhud harf-e-mohabbat hī kī tash.hīr haiñ āñkheñ

jis din se koī qarya-e-ehsās se guzrā

us din se mire vāste zanjīr haiñ āñkheñ

ye kis ke liye dil meñ talātum sā bapā hai

ye kis ke liye aaj bhī dil-gīr haiñ āñkheñ

ye kaun se manzar mirī āñkhoñ meñ base haiñ

lagtā hai mujhe vādī-e-kashmīr haiñ āñkheñ

'sajjād' se kal us ne ba-sad-nāz kahā thā

ye dekh tire ḳhvāb kī ta.abīr haiñ āñkheñ

jis roz se qirtas pe tahrir hain aankhen

us roz se lagta hai ki taswir hain aankhen

chehre hain sabhi ek se gar shahr-e-wafa mein

phir tum hi kaho kis ki ye tafsir hain aankhen

apnon ne mujhe lams ki tabligh se roka

KHud harf-e-mohabbat hi ki tashhir hain aankhen

jis din se koi qarya-e-ehsas se guzra

us din se mere waste zanjir hain aankhen

ye kis ke liye dil mein talatum sa bapa hai

ye kis ke liye aaj bhi dil-gir hain aankhen

ye kaun se manzar meri aankhon mein base hain

lagta hai mujhe wadi-e-kashmir hain aankhen

'sajjad' se kal us ne ba-sad-naz kaha tha

ye dekh tere KHwab ki tabir hain aankhen