jis samt bhi nikalta hun us samt Khaar hai

jis samt bhī nikaltā huuñ us samt ḳhaar hai

terā ye hijr merī javānī pe baar hai

ḳhushbū sī uḌ rahī hai havā.eñ hasīn haiñ

is samt ik faqīr kā shāyad mazār hai

kaTtā hai din mirā na basar ho rahī hai raat

sar pe mire ajiib aziyyat savār hai

ik vasl jis kī ḳhair ḳhabar hī nahīñ mujhe

ik hijr jis kī had hai na koī shumār hai

barsoñ se koī lams judā ho nahīñ rahā

muddat se ek yaad kā mujh ko ḳhumār hai

ai rahravān-e-dasht ḳhudā ke liye chalo

is qāfile meñ merā bhī ik shah-savār hai

bach kar kahāñ ga.e haiñ kabhī ahl-e-iztirāb

ye hijr ek teġh hai aur tez dhaar hai

sab kār-gāh-e-ishq meñ jaate haiñ shauq se

hālāñki koī baaġh nahīñ hai ye daar hai

har chiiz ko luTā ke rah-e-ishq meñ 'razā'

jo muskurā rahā hai vahī merā yaar hai

jis samt bhi nikalta hun us samt KHar hai

tera ye hijr meri jawani pe bar hai

KHushbu si uD rahi hai hawaen hasin hain

is samt ek faqir ka shayad mazar hai

kaTta hai din mera na basar ho rahi hai raat

sar pe mere ajib aziyyat sawar hai

ek wasl jis ki KHair KHabar hi nahin mujhe

ek hijr jis ki had hai na koi shumar hai

barson se koi lams juda ho nahin raha

muddat se ek yaad ka mujh ko KHumar hai

ai rahrawan-e-dasht KHuda ke liye chalo

is qafile mein mera bhi ek shah-sawar hai

bach kar kahan gae hain kabhi ahl-e-iztirab

ye hijr ek tegh hai aur tez dhaar hai

sab kar-gah-e-ishq mein jate hain shauq se

haalanki koi bagh nahin hai ye dar hai

har chiz ko luTa ke rah-e-ishq mein 'raza'

jo muskura raha hai wahi mera yar hai