jis se banti na thi kabhi apni

jis se bantī na thī kabhī apnī

mil ga.ī us se kunDalī apnī

anginat bhed khol detī hai

ek lamhe kī ḳhāmushī apnī

haa.e afsos ḳhud se milte vaqt

aaḌe aatī rahī kamī apnī

aah be-chārgāñ ke jaisī hai

pūchhte kyā ho zindagī apnī

kin ke asrār khul rahe haiñ mudām

aur hālat hai dīdanī apnī

pā-ba-zanjīr shauq hotā gayā

dekh le husn munsifī apnī

'umr-bhar saath saath the ham log

'umr-bhar ban nahīñ sakī apnī

kyoñ hai shams-o-qamar kā tū muhtāj

paidā kar ḳhud se raushnī apnī

haa.e dozaḳh ye peT kā dozaḳh

bech dī ham ne shā'irī apnī

bārishī sā mizāj hai us kā

aur naav hai kāġhazī apnī

maiñ sitāroñ se aage kyā jaatā

mujh meñ haa.il thī raushnī apnī

rabt-e-millat kā ḳhvāb thā apnā

par na tā'bīr ho sakī apnī

ham bhī karte qayās millat par

soch hotī jo hāshmī apnī

aise uljhe haiñ roz-o-shab meñ ham

barf hai soch par jamī apnī

jis se banti na thi kabhi apni

mil gai us se kunDali apni

anginat bhed khol deti hai

ek lamhe ki KHamushi apni

hae afsos KHud se milte waqt

aaDe aati rahi kami apni

aah be-chaargan ke jaisi hai

puchhte kya ho zindagi apni

kin ke asrar khul rahe hain mudam

aur haalat hai didani apni

pa-ba-zanjir shauq hota gaya

dekh le husn munsifi apni

'umr-bhar sath sath the hum log

'umr-bhar ban nahin saki apni

kyon hai shams-o-qamar ka tu muhtaj

paida kar KHud se raushni apni

hae dozaKH ye peT ka dozaKH

bech di hum ne sha'iri apni

barishi sa mizaj hai us ka

aur naw hai kaghazi apni

main sitaron se aage kya jata

mujh mein hail thi raushni apni

rabt-e-millat ka KHwab tha apna

par na ta'bir ho saki apni

hum bhi karte qayas millat par

soch hoti jo hashmi apni

aise uljhe hain roz-o-shab mein hum

barf hai soch par jami apni