jis shaKHs ki ho zist faqat nam se tere

jis shaḳhs kī ho ziist faqat naam se tere

us shaḳhs kā kyā haal ho paiġhām se tere

gaalī hai ki hai sehr koī yā ki hai afsūñ

jī shaad huā jaatā hai dushnām se tere

hai apnī ḳhushī is meñ ki to jis meñ ḳhushī ho

ārām hai apne ta.iiñ ārām se tere

āhista qadam rakhiyo tū ai nāqa-e-lailā

majnūñ kā bañdhā aatā hai dil gaam se tere

jab kūche meñ jā baiThte haiñ tere to apnī

āñkheñ lagī rahtī haiñ dar-o-bām se tere

hai apne hameñ kaam se kaam ai but-e-ḳhud-kām

ham kaam nahīñ rakhte haiñ kuchh kaam se tere

kyā hijr kī raat aa.ī ki mānind-e-charāġhāñ

phir jalne lage daaġh 'hasan' shaam se tere

jis shaKHs ki ho zist faqat nam se tere

us shaKHs ka kya haal ho paigham se tere

gali hai ki hai sehr koi ya ki hai afsun

ji shad hua jata hai dushnam se tere

hai apni KHushi is mein ki to jis mein KHushi ho

aaram hai apne tain aaram se tere

aahista qadam rakhiyo tu ai naqa-e-laila

majnun ka bandha aata hai dil gam se tere

jab kuche mein ja baiThte hain tere to apni

aankhen lagi rahti hain dar-o-baam se tere

hai apne hamein kaam se kaam ai but-e-KHud-kaam

hum kaam nahin rakhte hain kuchh kaam se tere

kya hijr ki raat aai ki manind-e-charaghan

phir jalne lage dagh 'hasan' sham se tere