jis talak meri rasai ho rahi hai

jis talak merī rasā.ī ho rahī hai

ai ḳhudā us se laḌā.ī ho rahī hai

ḳhūbsūrat shaḳhs haT jā sāmne se

merī āñkhoñ kī fanā.ī ho rahī hai

fāsla sā rakhtā huuñ ab yaar se maiñ

ishq meñ bhī pārsā.ī ho rahī hai

ai chaman royā nahīñ is baat par tū

phuul se merī judā.ī ho rahī hai

ḳhuun karne vaalā bhī shāyad yahī hai

haañ yahī jis kī gavāhī ho rahī hai

aur maiñ sab dushmanoñ se laḌ chukā huuñ

ab mirī ḳhud se laḌā.ī ho rahī hai

haath āñkhoñ pe yahāñ parda vahāñ bhī

kyā ajab sī muñh-dikhā.ī ho rahī hai

ġhāliban kuchh baat achchhī hogī mujh meñ

har taraf merī burā.ī ho rahī hai

jis talak meri rasai ho rahi hai

ai KHuda us se laDai ho rahi hai

KHubsurat shaKHs haT ja samne se

meri aankhon ki fanai ho rahi hai

fasla sa rakhta hun ab yar se main

ishq mein bhi parsai ho rahi hai

ai chaman roya nahin is baat par tu

phul se meri judai ho rahi hai

KHun karne wala bhi shayad yahi hai

han yahi jis ki gawahi ho rahi hai

aur main sab dushmanon se laD chuka hun

ab meri KHud se laDai ho rahi hai

hath aankhon pe yahan parda wahan bhi

kya ajab si munh-dikhai ho rahi hai

ghaaliban kuchh baat achchhi hogi mujh mein

har taraf meri burai ho rahi hai