jis taraf dekho udhar ek sar-ba-sar bazar hai

jis taraf dekho udhar ik sar-ba-sar bāzār hai

ghar bhī ik bāzār hai aur rahguzar bāzār hai

dil kī bāteñ kis se kiije kaun suntā hai yahāñ

vo jo merā ham-safar hai ham-safar bāzār hai

dasht se tum kyoñ palaT kar aa ga.e is shahr meñ

ye kabhī jo shahr thā ab sar-basar bāzār hai

ik hunar ke saath rakhtā hai vo aisā ik hunar

naam hai dīvāngī kā aur hunar bāzār hai

jo gayā vo luT-luTā kar hī vahāñ se aa gayā

sab ke sab kahte to haiñ ik mo'tabar bāzār hai

tum use apnā samajh kar us ke pīchhe chal paḌe

tum ne kab samjhā use vo rāhbar bāzār hai

ham vahāñ jaate to phañs jaate usī ke jaal meñ

duur hī se lauT aa.e dekh kar bāzār hai

ham ne us se kuchh kahā thā us ne un se kuchh kahā

kyā kaheñ is daur kā har nāma-bar bāzār hai

kaun samjhā.e unheñ bāzār kā hissa jo haiñ

zindagī kā ye safar ik muḳhtasar bāzār hai

aap vahshat ke liye sahrā meñ aa.e haiñ 'riyāz'

aap ke dil meñ hai Dar aur ye hī Dar bāzār hai

jis taraf dekho udhar ek sar-ba-sar bazar hai

ghar bhi ek bazar hai aur rahguzar bazar hai

dil ki baaten kis se kije kaun sunta hai yahan

wo jo mera ham-safar hai ham-safar bazar hai

dasht se tum kyon palaT kar aa gae is shahr mein

ye kabhi jo shahr tha ab sar-basar bazar hai

ek hunar ke sath rakhta hai wo aisa ek hunar

nam hai diwangi ka aur hunar bazar hai

jo gaya wo luT-luTa kar hi wahan se aa gaya

sab ke sab kahte to hain ek mo'tabar bazar hai

tum use apna samajh kar us ke pichhe chal paDe

tum ne kab samjha use wo rahbar bazar hai

hum wahan jate to phans jate usi ke jal mein

dur hi se lauT aae dekh kar bazar hai

hum ne us se kuchh kaha tha us ne un se kuchh kaha

kya kahen is daur ka har nama-bar bazar hai

kaun samjhae unhen bazar ka hissa jo hain

zindagi ka ye safar ek muKHtasar bazar hai

aap wahshat ke liye sahra mein aae hain 'riyaz'

aap ke dil mein hai Dar aur ye hi Dar bazar hai