jis taraf jaiye milte hain adawat wale

jis taraf jā.iye milte haiñ adāvat vaale

uTh ga.e duniyā se kyā log mohabbat vaale

dosto tum ho agar chashm-e-ināyat vaale

ham bhī kuchh kam nahīñ ḳhud.dār tabī.at vaale

apne hāthoñ se banāte haiñ muqaddar apnā

gardish-e-vaqt se Darte nahīñ himmat vaale

mauj sāhil kā bhī sar toḌ ke rakh detī hai

kyā samajhte haiñ ġharīboñ ko ye daulat vaale

jitne baune the unheñ tamġha-o-e.azāz milā

aur chup rah ga.e ūñche qad-o-qāmat vaale

ibtidā hī meñ ye vahshat ye badan meñ larzish

marhale aur bhī ā.eñge musībat vaale

manzil-e-dār pe ik maiñ hī akelā pahuñchā

ghar se nikle the bahut shauq-e-shahādat vaale

talḳh bātoñ ko bhī sah lete haiñ chup-chāp 'zafar'

muñh kamīnoñ se lagāte nahīñ izzat vaale

jis taraf jaiye milte hain adawat wale

uTh gae duniya se kya log mohabbat wale

dosto tum ho agar chashm-e-inayat wale

hum bhi kuchh kam nahin KHuddar tabiat wale

apne hathon se banate hain muqaddar apna

gardish-e-waqt se Darte nahin himmat wale

mauj sahil ka bhi sar toD ke rakh deti hai

kya samajhte hain gharibon ko ye daulat wale

jitne baune the unhen tamgha-o-eazaz mila

aur chup rah gae unche qad-o-qamat wale

ibtida hi mein ye wahshat ye badan mein larzish

marhale aur bhi aaenge musibat wale

manzil-e-dar pe ek main hi akela pahuncha

ghar se nikle the bahut shauq-e-shahadat wale

talKH baaton ko bhi sah lete hain chup-chap 'zafar'

munh kaminon se lagate nahin izzat wale