jis taraf jaoge ek shor sunai dega

jis taraf jāoge ik shor sunā.ī degā

kahīñ lekin koī chehra na dikhā.ī degā

jaane kyā haal nigāhoñ kā vo lamha kar de

jab na kuchh tere sivā mujh ko dikhā.ī degā

Dūbte vaqt kī āvāz huuñ kar lo mahfūz

phir mire baa'd ye naġhma na sunā.ī degā

haath phailāte hue is liye Dar lagtā hai

kyā karūñgā vo agar mujh ko ḳhudā.ī degā

raat ko pyaar kī sauġhāt milī hai jis se

sub.h hogī to vahī zaḳhm-e-judā.ī degā

itnā chup-chup jo paḌā hai to ġhanīmat jaano

dil ko chheḌoge to sau tarh duhā.ī degā

ruuh ke saath maiñ uḌ jā.uñgā jaane kis or

jab mujhe qaid-e-badan se vo rihā.ī degā

haath kho.e haiñ to kyoñ DhūñD rahe ho 'ḳhāvar'

kyā tumheñ ghor añdhere meñ sujhā.ī degā

jis taraf jaoge ek shor sunai dega

kahin lekin koi chehra na dikhai dega

jaane kya haal nigahon ka wo lamha kar de

jab na kuchh tere siwa mujh ko dikhai dega

Dubte waqt ki aawaz hun kar lo mahfuz

phir mere ba'd ye naghma na sunai dega

hath phailate hue is liye Dar lagta hai

kya karunga wo agar mujh ko KHudai dega

raat ko pyar ki saughat mili hai jis se

subh hogi to wahi zaKHm-e-judai dega

itna chup-chup jo paDa hai to ghanimat jaano

dil ko chheDoge to sau tarh duhai dega

ruh ke sath main uD jaunga jaane kis or

jab mujhe qaid-e-badan se wo rihai dega

hath khoe hain to kyon DhunD rahe ho 'KHawar'

kya tumhein ghor andhere mein sujhai dega