jis waqt se KHafa wo mera yar ho gaya

jis vaqt se ḳhafā vo mirā yaar ho gayā

karnā sahar bhī shaam ko dushvār ho gayā

mujh zaar se vo turk jo do-chār ho gayā

tīr-e-nigāh dil ke mire paar ho gayā

jab se lagī hai aañkh se us kī hamārī aañkh

har-dam ḳhayāl-e-nargis-e-bīmār ho gayā

do dil ko mil ke baiThne detā nahīñ hai tū

kyā sheva terā gumbad-e-davvār ho gayā

shikva bhalā raqīb kā kis se karūñ ki jab

dil sā rafīq dar-pa.e-āzār ho gayā

bātoñ pe tū vilāyat-e-be-pīr kī na jā

iifā butoñ kā bhī kahīñ iqrār ho gayā

kaisī bahār kaisā chaman kaisā naach rang

apnī baġhal se jabki judā yaar ho gayā

us ne kiyā ishāra jo mahfil meñ ġhair se

ik tīr-e-rashk dil ke mire paar ho gayā

us sham.a-rū ne mujh ko jo bulvāyā bazm meñ

jal kar adū mirā vahīñ finnār ho gayā

qātil nahīñ rahī mujhe ummīd-e-zindagī

'ḳhanjar' kā tere sar pe mire vaar ho gayā

jis waqt se KHafa wo mera yar ho gaya

karna sahar bhi sham ko dushwar ho gaya

mujh zar se wo turk jo do-chaar ho gaya

tir-e-nigah dil ke mere par ho gaya

jab se lagi hai aankh se us ki hamari aankh

har-dam KHayal-e-nargis-e-bimar ho gaya

do dil ko mil ke baiThne deta nahin hai tu

kya shewa tera gumbad-e-dawwar ho gaya

shikwa bhala raqib ka kis se karun ki jab

dil sa rafiq dar-pae-azar ho gaya

baaton pe tu wilayat-e-be-pir ki na ja

ifa buton ka bhi kahin iqrar ho gaya

kaisi bahaar kaisa chaman kaisa nach rang

apni baghal se jabki juda yar ho gaya

us ne kiya ishaara jo mahfil mein ghair se

ek tir-e-rashk dil ke mere par ho gaya

us shama-ru ne mujh ko jo bulwaya bazm mein

jal kar adu mera wahin finnar ho gaya

qatil nahin rahi mujhe ummid-e-zindagi

'KHanjar' ka tere sar pe mere war ho gaya